Ein Blog
Canu a Dawnsio gyda Bochau
Mae pob pennod o’r cyfres gomedi Annibendod yn cloi gyda chân gan Bochau, bochdew anwes Anni. Nid creadur swil a thawel mohono, o na! Mae Bochau’n llawn hwyl, drygioni ac wrth ei fodd yn bwyta sbrowts, canu a dawnsio. Felly mae cael cyfle i ddangos ei ddawn am berfformio ym mhob pennod yn fêl ar ei bawennau!
Wedi eu hysbrydoli gan ddigwyddiadau o’r rhaglenni, mae’r caneuon hwyliog yn cyflwyno geirfa bwrpasol yn ôl thema/themâu pob pennod, ynghyd â phatrymau iaith defnyddiol y gellid eu defnyddio bob dydd.
Weithion ni gyda’r Mudiad Meithrin i sicrhau geirfa sy’n addas i siaradwyr Cymraeg ifanc ac i’r rheiny sy’n dysgu Cymraeg mewn ysgolion cyfrwng Saesneg.
A’r newyddion da yw…mae’r caneuon nawr ar gael ar YouTube, Spotify a phlatfformau ffrydio cerddoriaeth eraill
Fydd y caneuon syml a difyr yma’n siŵr o godi gwên! 😊
Annibendod
Annibendod, o’r diwedd!
Weithiau mae’n talu ffordd i fod yn ddygn…ar ôl 5 mlynedd o ddatblygu, wedi’ arafu oherwydd Covid 19, mae’n cyfres drama-gomedi cyfrwng cymysg yn cyrraedd y sgrin o’r diwedd.
Anturiaethau anniben merch anarchaidd, fywiog, llawn hwyl o’r enw Anni (yr hynod wych Agnes Evans) yw ‘Annibendod’. Yn gwmni yn ei direidi mae sawl ffrind a’i bochdew animeiddiedig Bochau, sy’n caru tipyn o firi yn ogystal â chân a dawns!
Mae’r comisiwn yn 20 pennod, 10 munud o hyd gyda chân wedi’i hanimeiddio ym mhob pennod.
Gan fod hwn yn dasg mor fawr, fe benderfynon ni is-gontractio cwmni Boom Plant i ofalu am rai agweddau o’r prosiect ac wedi bod yn ffodus i weithio gyda’u Rheolwr Cynhyrchiad Marian Eluned, y cyfarwyddwr Nathan Ifans a sawl aelod o’u criw ffilmio.
Wedi’i hanimeiddio gan Cloth Cat a gyda chaneuon gwych gan y Cyfarwyddwr Cerdd Dyfan Jones, dan arweiniad tîm Mudiad Meithrin i sicrhau addasrwydd ar gyfer plant ifanc sy’n dysgu Cymraeg, gobeithiwn y caiff y gwylwyr gymaint o hwyl yn ei wylio ag a gawsom yn ei wneud.
Cyfleoedd Castio
Yn gweithio i Mosaic Films ar gyfer BBC Bitesize, ry’n ni’n chwilio ar dalent ifanc sy’n siarad Cymraeg!
Ry’n ni’n chwilio am gyflwynydd ar gyfer cyfres o ffilmiau byrion ar ramadeg Cymraeg ar gyfer BBC Bitesize. Bydd y fideos yn egluro pwyntiau gramadeg Cymraeg yn Saesneg yn gryno ar gyfer cynulleidfa o blant 11 – 14 oed. Bydd y ffilmio yn digwydd mewn stiwdio, gyda sgrin werdd, a bydd y cynnwys terfynol yn cael ei ddangos ar-lein mewn fformat digidol ffurf fer. Byddwn yn ffilmio ganol mis Ionawr am un diwrnod mewn stiwdio yng Nghaerdydd neu’r cyffuniau.
CYFLWYNYDD
Gofynion:
- Rhwng 18 a 23 oed
- Cymraeg a Saesneg rhugl
- Steil wybodus, hyderus, clir a chynnes wrth gyflwyno
- Ffafrir profiad blaenorol ar gamera neu gefndir mewn addysg/cyflwyno
I’w ddanfon atom:
- Fideo byr (1 munud 30 eiliad) yn cyflwyno’ch hun, gan gynnwys pytiau mewn Cymraeg a Saesneg
Dyddiadau Allweddol:
- Cyflwyniadau i’n cyrraedd erbyn: 6/12/24
- Cyfnod Ffilmio: canol Ionawr 2025
CYFRANWYR
Rydym hefyd yn chwilio am gyfranwyr / actorion ifanc ar gyfer cyfres o ffilmiau i gyd-fynd gyda’r fideos gramadeg. Bydd y fideos yma’n dilyn ffurf ddogfennol ac yn defnyddio sgyrsiau i arddangos pwyntiau gramadeg. Bydd y fideos yn trafod bywydau bob dydd, hobïau a barn y cyfranwyr. Bydd y cynnwys terfynol yn cael ei ddangos ar-lein mewn fformat digidol ffurf fer. Byddwn yn ffilmio yng Nghaerdydd a’r cyffiniau o ganol Ionawr tan ganol Chwefror.
Gofynion:
- Rhwng 18 a 23 oed
- Cymraeg rhugl
- Yn gynnes, yn hyderus, naws sgwrsiol sydd â’r gallu i ymgysylltu â dysgwyr.
- Rhaid bod yn gyfforddus yn dilyn sgript a siarad ar gamera
- Yn gyfforddus yn rhannu gwybodaeth bersonol sylfaenol ar y sgrin (trafod hobïau neu hoff gerddoriaeth, er enghraifft)
I’w ddanfon atom:
- Fideo fer (1 munud 30 eiliad) yn cyflwyno eich hun
- Perfformiad o sgript 1 munud o hyd. Cysylltwch â Siwan i dderbyn copi.
- Mewn e-bost, rhowch fanylion hobïau, profiadau, neu leoliadau sy’n gysylltiedig â’ch bywyd bob dydd a allai lywio’ch stori yn y gyfres
Dyddiadau Allweddol:
- Cyflwyniadau i’n cyrraedd erbyn: 6/12/24
- Cyfnod Ffilmio: canol Ionawr 2025 i ganol Chwefror
Os oes gennych gwestiynau pellach ac i holi am sgript, cysylltwch â Siwan: siwan@twtproductions.cymru
Dyma’r cyfeiriad hefyd ar gyfer danfon eich fideos
Cynhyrchiad mwy Gwyrdd
Ry’ ni ‘gyd yn edrych am ffyrdd o fod yn fwy gwyrdd a chynaliadwy ar gynyrchiadau’r dyddiau hyn. Mae gwefan Albert yn le da i godi syniadau. https://wearealbert.org/
Ffordd amlwg a syml o fod y fwy gwyrdd yw ystyried sut mae criwiau’n teithio i’r gwaith. Oes modd rhannu lifftiau, er enghraifft neu gerdded? Ffordd arall yw edrych ar y defnydd ni’n ei wneud o wisgoedd a phropiau.
Ar gyfer ein cynhyrchiad diweddaraf ni, Annibendod, ry’ ni’n cydweithio gyda Boom Plant. Yn ogystal âr faith bod gan y cwmni dîm cefnogi cynyrchiadau a chriw ffilmio gwych, un o’r manteision i ni o weithio gyda Boom yw’r gallu i ni dwrio drwy eu storfa bropiau enfawr a defnyddio’r hyn ry’n ni ei eisiau. Mae’r lle fel Ogof Aladin (ond heb y genie)!
Eisiau lamp? Mae 20 ohonynt. Eisiau wellingtons? Pa faint yw’r unig gwestiwn! Eisiau llestri cegin? Pa liw sy’ gyda chi mewn golwg?!
Mae’r storfa yma wedi’n galluogi ni i gadw golwg gofalus ar wariant ein cyllideb a hefyd ymddwyn yn fwy amgylcheddol drwy beidio gor- brynu. Wrth gwrs, weithiau mae’n rhaid prynu ond mae’r pethau hynny’n mynd yn ôl i’r storfa wedi i ni orffen ffilmio, yn barod am ail gyfres neu gyfres cwbl wahanol. Mae pawb er eu hennill!
Y Pitws Bychain
Am bleser yw cynhyrchu’r fersiwn Gymraeg o The Wee Littles gan Magpie 6 Media i S4C.
Efa a’i gwên hyfryd sy’n serennu ac mae wedi bod wrthi’n lleisio’n ddiwyd i ni drwy’r gwyliau haf. Da iawn ti Efa!
Rydym yn lleisio yn Cranc Audio a Dewi Evans sy’n golygu. Casia Wiliam sy’n trosi’r gyfres i ni.
Gŵyl Animeiddio Caerdydd
Roedd yn wych unwaith eto gallu bod yn un o noddwyr Gŵyl Animeiddio Caerdydd.
Mae Cynyrchiadau Twt yn ddibynnol iawn ar dalent animeiddio cwmnïau ac unigolion o gymra ar gyfer nifer o’n prosiectau ni felly mae’n bwysig i ni ein bod yn gallu cefnogi’r sector ble a phryd maen bosib. Mae ‘na gyfoeth o dalent yma yng Nghymru ac heb gwyliau fel hyn ble mae cyfle i bobl gyfarfod cyfoedion, gwneud cysylltiadau, clywed gan feistri yn eu maes a mwynhau bod yn rhan o’r sector, yn holl bwysig.
Brethyn & Fflwff ar S4C
Mae wedi bod yn bleser cynhyrchu fersiwn Gymraeg o gyfres animeiddio stop frame Second Home Studios, Brethyn & Fflwff
Lansiodd y gyfres bore ‘ma ar Cyw ac mae bellach ar gael ar yr iplayer a gwasanaeth ffrydio S4C, Clic.
Addaswyd y gyfres annwyl ac hyfryd hon gan Casia Wiliam a Tara Bethan sy’n lleisio.
https://www.bbc.co.uk/iplayer/episodes/p0hpff6q/brethyn-fflwff
Bwydydd Blasus
Pum mlynedd ar ôl gweithio ar yr addasiad Cymraeg o Shane the Chef, roeddem yn falch iawn o gael cais i ymgynghori ar gyfres o gynnwys ffurf fer ar gyfer sianel YouTube Shane the Chef.
https://www.youtube.com/@ShanetheChef
Mae’r sianel yn llawn dop o ryseitiau a chlipiau o fwydydd blasus y gyfres.
Ar gyfer y ffilmiau ‘byw’, hwyl, bwydydd anarferol a thasgau oedd trefn y dydd. Cafwyd diwrnod gwych yn ffilmio gyda phedwar seren ifanc yn Qu studios ym Mryste. Bydd rhagor o gynnwys yn cael ei ychwanegu i’r sianel yn wythnosol. https://www.youtube.com/shorts/XY8-Mhf9nW0
Cronfa Cyfle i Bawb – Gwersylloedd Haf yr Urdd
Mae Cynyrchiadau Twt yn falch iawn ein bod wedi gallu cyfrannu at Gronfa Cyfle i Bawb – Gwersylloedd Haf yr Urdd 20023-24. Mae’r gronfa’n casglu arian gan gwmnïau ac unigolion er mwyn sicrhau gwyliau yn un o wersylloedd yr Urdd ar gyfer plant o gefndir ariannol heriol.
Mae’n achos gwerth chweil ac yn un yr ydym yn falch iawn o’i gefnogi.
Ry’ ni’n castio!
Cyfres am hynt a helynt doniol merch ifanc hynod anniben yw Annibendod. Anni yw’r prif gymeriad ac mae ganddi griw o ffrindiau. Byddwn yn castio ar gyfer Anni a’i ffrindiau.
Mae gan Anni fochdew animeiddiedig hefyd o’r enw Bochau .
Mae hon yn gyfres gomedi gyda’r pwyslais ar gomedi gweledol. Bydd oedolion yn cyd-actio gyda’r plant.
Byddwn yn dechrau ffilmio’r gyfres ar Fai’r 29ain, sef wythnos gwyliau’r Sulgwyn – wythnos Eisteddfod yr Urdd. Ni fydd y dyddiadau yma’n newid felly ystyriwch yn galed cyn ymgeisio os ydy’ch plentyn yn bwriadu cymeryd rhan yr yr Eisteddfod neu eich bod wedi trefnu gwyliau.